လူ့ပြိတ္တာများ ( the lord of the ring - ဆင်သေချောက်ရတနာ)

 လူ့ပြိတ္တာများ ( the lord of the ring - ဆင်သေချောက်ရတနာ) 

.

ကမ္ဘာကျော် the lord of the ring ဆိုတဲ့ကားထဲက စမီဂေါဆိုတဲ့ မှင်စာလိုလိုသရဲလိုလိုသတ္တဝါလေးကို သိကြမယ်ထင်တယ် 

သူက လက်စွပ်လေးအပေါ် စွဲလမ်းတပ်မက်လွန်းတဲ့စိတ်အစဉ်ကြောင့် မအိပ်နိုင်မစားနိုင်ဖြစ်ကာ လူသားစင်စစ်ကနေ အရုပ်ဆိုးအကျည်းတန်တဲ့ ထိုပုံစံပြောင်းသွားတာပါ

ထိုကဲ့သို့ ရုပ်ဝတ္ထုပစ္စည်းအပေါ် လွန်လွန်ကဲကဲစွဲလန်းတတ်သူကို ဗမာတို့က သေရင်ပြိတ္တာဖြစ်လိမ့်မယ်လို့ဆိုကြတယ်မဟုတ်လား သူကတော့ လက်ရှိဘဝမှာတင်ကို အဆင်းသဏ္ဍာန်ပါပြောင်းလဲသွားပုံမျိုးပါ

ဆရာဆွေမင်း (ဓနုဖြူ) ရဲ့ ဆင်သေချောက်ရတနာဆိုတဲ့ စာအုပ်က ဒီသဘောနဲ့အတော်နီးစပ်တယ်

ရတနာတခုပိုင်ဆိုင်ရချိန်မှာ ဖြစ်ပေါ်လာတဲ့စိတ်သဘာဝ ပြောင်းလဲလာတဲ့အဆင်းသဏ္ဍာန်အသွင်အပြင်ကို တဆင့်ချင်းပြသွားတာ သိပ်ပြည့်စုံတယ် 

အများပြောကြသလိုပေါ့ ငွေကလူကို ဖျက်စီးတတ်တယ်

လူတွေက ငွေရှိရင်ပြောင်းလဲသွားတတ်တယ်တဲ့

အမှန်တော့ ငွေက လူကိုဖျက်စီးတာ ပျက်စီးစေတာထက် ပုထုဇဉ်လူသားတို့မှာ တိမ်မြှုပ်နေတဲ့ ပကတိစိတ်ထားတွေကို ပေါ်လွင်စေတာဆိုရင် ပိုမှန်ပါလိမ့်မယ်

ဒီစာအုပ်မှာဆိုရင်ကြည့်လေ သာမန်အားဖြင့် သဘောကောင်းတယ် ဣိဿာမစ္ဆရိယမရှိဘူးလို့ထင်ရတဲ့ ဆရာတွတ်တို့မိသားစုဟာ ဆင်သေချောက်ထဲက ပတ္တမြားလေးတလုံး အမှတ်မထင်ရရှိလာအပြီးမှာ ထိုအရာလေးက သူ့တို့စိတ်ကို အစဉ်ကိုစိုးမိုးလို့ လူတိုင်းကို ကိုယ့်ပိုင်ဆိုင်မှုကို လုယူမလား ခိုးယူလေမလားရယ်လို့ သံသယစိတ်နဲ့ မအိပ်နိုင်မစားနိုင်အချိန်တိုင်းတထိတ်ထိတ်ဖြစ်လို့ ပိန်းချုံးကျလာသတဲ့

ဗုဒ္ဓစာပေထဲက ပြိတ္တာရဲ့ ဂုဏ်အင်ကိုစမ်းစစ်ကြည့်ရင် ကိုယ် စားလို့ဝတ်လို့ သုံးဆောင်လို့မရတာကို စွန့်လည်းမစွန့်လွှတ်နိုင်တော့ တကြောင့်ကျကျ သူတပါးရယူသွားမှာကိုလည်းမလိုလားတော့ ဟောက်ရင်းခြောက်ရင်းမာန်ဖီရင်း ကိုယ့်အတွက်ဘယ်တော့မှဖြစ်လာမှာမဟုတ်တဲ့အရာအတွက် ဒုက္ခခံနေရတာမျိုးတွေလည်းပါဝင်ပါတယ်

ဒီအရည်အသွေးကိုသာ ပဓာနထားရင် တမလွန်ဘဝ သေမှရယ်မဟုတ်ဘဲ လက်ရှိဘဝ ပကတိအချိန်မှာပဲ အရှင်လတ်လတ် ပြိတ္တာဖြစ်နိုင်တယ်လို့ ဆိုရမယ်ထင်တယ်

ထူးတော့လည်းမဆန်းပါဘူး ကျွန်တော်တို့အားလုံးမှာ ဖြစ်တတ်တဲ့ ဖြစ်လာမယ့် စိတ်သဘောပါပဲ မဖြစ်သေးတာပဲရှိမှာပါ ပုထုဇဉ်တွေကိုး

ဒီအခါမှာ ကိုယ့်ကိုယ်ကို သတိမထားမိချင်မှထားမိနိုင်ပေမယ့်

ပတ်ဝန်းကျင်အမြင်မှာတော့ အများအမြင်မှာတော့ the lord of the ring ဆိုတဲ့ကားထဲက စမီဂေါ လို ဆင်သေချောက်ရတနာထဲက ဆရာတွတ်တို့မိသားစုလို ဖြစ်နေဖြစ်နေမှာဆိုတာ သတိကပ်ဆင်ခြင်နိုင်ကြပါစေလို့ ဆန္ဒပြုရင်း

.

.

အဆိုပါ စာအုပ်တွေကို ဒို့ခေတ်ယူကျုချန်နယ်မှာ အမောင်နွားကျောင်းသားဖတ်ပြတာရှိတယ်ဗျ အဲ့သည်မှာ သွားရောက်နားစဉ်လို့ တော်လှန်ရေးမှာတတပ်တအားပါဝင်နိုင်ပါတယ်

လူကြီးမင်းတို့ရဲ့အားထုတ်မှု အဟောသိကံမဖြစ်ဖို့ VPN ခံဖို့လည်း မမေ့နဲ့အုံးဗျနော

စာအုပ်ဝယ်ဖတ်မယ်ဆိုရင်လည်း ဆရာဆွေမင်း (ဓနုဖြူ) ရဲ့ မိသားစုမျိုးဆက်တို့အတွက် အသီးအပွင့်ခံစားရစေမှာပါလို့

။

။

။

#အရေးတော်ပုံအောင်တော့မည်

#စစ်အာဏာရှင်မုချအဆုံးသတ်တော့မည်

။

ကိုလေး ☆ အင်းတဲ