(ဇာတ်သဘင်တခေတ်ဆန်းပြီ ...တဲ့)
(ငတိုလှိုင်ရဲ့အဆုံးသတ် / ၄၇)
.
လွန်ခဲ့တဲ့နှစ်ပိုင်းတွေက ဇာတ်သဘင်လောကရဲ့ လတ်တလော ဥသျှောင်က ဒီအသံနဲကြွေးကြော်လို့ တီဗီချန်နယ်မှာ ရိုက်ကူးထုတ်လွှင့်မှုတွေလုပ်နေတာကိုတွေ့ရတယ်
#ညဇာတ်ခုံမှာနေသာပြီ....တဲ့
ဒီမှာ နေသာပြီဆိုတဲ့ ဝေါဟာရက အမှောင်ကျပြီး ပြန်လည်လင်းလက်လာပြီဆိုတဲ့အဓိပ္ပာယ်ပေါ့
ဟုတ်တော့လည်းဟုတ်ပါတယ် ကိုဗစ်လော့ဒေါင်းကာလမှာ လူစုလူဝေးမပြုရဆိုတော့ ဇာတ်သဘင်တွေက လုံးဝရပ်နားသွားတာကို ဒီတော့လုံးဝမှောင်မိုက်သွားခဲ့တာပေါ့
________________________________
နောက်တော့ စစ်အာဏာရှင်ရဲ့ နိုင်ငံကိုမတရားလုယက်အမဲဖျက်မှကြောင့် ရုတ်တရက်ဖြစ်ပေါ်လာတဲ့ မတရားမှုကိုလက်မခံလိုတဲ့ ပကတိစစ်မှန်တဲ့ ခံစားမှုတို့ကြောင့် ဖီဆန်ဆန့်ကျင်တော်လှန်ဖို့ရွေးချယ်ရင်း တမင်မလင်းစေခဲ့တဲ့ ညဇာတ်ခုတွေ မှောင်မြဲမှောင်စဲဖြစ်နေရာက ခု နှစ်ပိုင်းမှတော့ တရားမှုပြန်ရသွားလို့လား စစ်အာဏာရှင်စနစ်ဆိတ်သုဉ်းသွားလိုလေလား
သို့တည်းမဟုတ် စိတ်ဆန္ဒတို့က ကောက်ရိုးမီးပမာ #တဒင်္ဂအတွင်းရုတ်ချည်တောက်လောင်ပြာကျသွားလို့လေလားမဆိုနိုင်
ဟိုမှသည်မှ မှိတ်တုတ်မှိတ်တုတ်ထွန်းလာခဲ့ရာမှ ခုတော့ စစ်အာဏာရှင်ခွင့်ပြုတဲ့အတိုင်းအတာအထိ သဘောတူနှစ်သက်ရာလောက်အထိ နိုင်ငံအဝှမ်းသူတို့ရက်စက်ယုတ်မာလေသမျှ အနည်းငယ်မျှ ကူညီညာဖုံးလွှမ်းနိုင် အာရုံလွှဲပြောင်းနိုင်ရင်ကိုမဆိုးလှဘူးရယ်လို့ အသုံးကျနိုင်သလောက် အသုံးချနိုင်သလောက် ညဇာတ်ခုံမှာ မီးတွေထွန်းညှိနေနိုင်ကြပြီ
အသုံးချခံရတာလား လိုလားစွာ အကျိုးတူ ရမှန်းချက်တူပူးပေါင်းကြတာလားဆိုတာကတော့ သူတို့ကပဲ အဖြေမှန်ပေးနိုင်ပါလိမ့်မယ်
ထားပါတော့
ဒါကိုသူတို့နဲ့ပေါင်းအပါတွေကကြွေးကြော်ကြတယ် ဇာတ်သဘင်တခေတ်ဆန်းပြီ တဲ့
________________________________
ဒီစကာတွေကြားတော့ အဆိုတော် #မီမီဝင်းဖေ ရဲ့ဖခင် ယခင်က #မန္တလေးပန်တျာကျောင်းဥက္ကဋ္ဌဒါရိုက်တာကြီးဦးဝင်းဖေ ပြောပြတလေးတောင် သတိရမိတယ်
သူတို့အရပ်မှာ ဇာတ်ပွဲဖြစ်တော့ မြို့ရောက်ဖူးသူတယောက်က ထိုပွဲမှာ ဖာလူဒါရောင်းမယ်ဆိုပြီး သတင်းလွှင့်ကြေညာသတဲ့
တကယ်လည်းရောင်းပါတယ်
ဒါပေမယ့်သူရောင်းတာက သကြားရည်မှာ အရောင်ပါမုန့်ဖတ်လေးတွေ ပေါင်မုန့်ဖတ်လေးတွေပါတာကလွဲလို့ သူတို့စားဖူးနေကျ ရွှေရင်အေးတို့ မုန့်လက်ဆောင်းတို့နဲ့ ဘာမှမကွာတော့
မင်းဟာက ဖာလူဒါဟုတ်မှဟုတ်ရဲ့လားကွာ စားကြည့်ရသလောက် မုန့်လက်ဆောင်းလိုလို ရွှေရင်အေးလိုလိုပါပဲဆိုတော့ လျှာမရှည်နဲ့ မင်းတို့က ဖာလူဒါမြင်ဖူးလို့လား ငါကမြင်ဖူးရုံမက စားပါစားဖူးတယ်ကွ
#ငါကဖာလူဒါဆိုဖာလူပဲပေါ့ တဲ့
________________________________
ခုလည်း ဇာတ်သဘင်တခေတ်ဆန်းပြီလို့ ကြွေးကြော်နေကြတဲ့ ဗီဒီယိုအတိုလေး Facebook မှာတက်လာလို့ အမှတ်မထင်ကြည့်မိရာက ဒီသဘောလေးတွေးမိတယ်
တကယ်ကောင်းတယ် အနှစ်သာရပြည့်တယ် အားထုတ်မှုရှိတယ် ဆန်းသစ်တယ် လုံးလပညာစိုက်ထုတ်တယ်ဆိုရင်တော့ ဒီကြွေးကြော်သံအတွက် ဝိဝါဒကွဲစရာမရှိပါဘူး
ခုနောက်မှာတွဲဆက်ထားတဲ့ ဗီဒီယိုလေးနှစ်ခုကို ချိန်ထိုးကြည့်ကြည့်ပါ အဲ့အက က ကိုယ်တွေငယ်ငယ်ကတော့ စကောဝိုင်းတို့ ကင်းမြှီးကောက်တို့ခေါ်တယ် တကယ်စည်းစနစ်ကျန လှလှပပဘယ်လိုကရလဲဆိုတာ မြင်သာရုံပါပဲ
တကယ်မြန်မာ့ဇာတ်သဘင်တခေတ်ဆန်းတာလား
ဒါမှမဟုတ် မုန့်လက်ဆောင်းကို ဖာလူဒါအလား ထင်မှတ်စေတာမျိုးလား ဆန်းစစ်ကြည့်နိုင်ဖို့ပါ
________________________________
ဒါမှမဟုတ် ကိုပဒေသာပြောသလို
တပ် ရယ် ၊ နတ် ရယ် ၊ ဇာတ် ရယ်
အတွဲညီညီပေါင်းစပ်ပြီး မြန်မာပြည်ကို ပြာချနေသလားဆိုတာကိုပေါ့
.
.
#အရေးတော်ပုံအောင်တော့မည်
#စစ်အာဏာရှင်မုချအဆုံးသတ်တော့မည်
။
ကိုလေး ☆ အင်းတဲ
No comments:
Post a Comment