။
ခေါင်းစဉ်က နည်းနည်းတော့ထိလွယ်ရှလွယ်ဖြစ်လိမ့်မယ်ထင်တယ်
ဒီလိုဗျ ဆရာဆွေမင်း (ဓနုဖြူ) ရဲ့ ဒီမြိုင်ရာဇာတွတ်ပီ ဇာတ်လမ်း ဇာတ်ကောင်ငြိမ်ပြီးကာလမှာ ဇာတ်ကောင်တွေက ကိုယ်ပိုင်စရိုက်လက္ခဏာ ကိုယ်ပိုင်ဘဝ ကိုယ်ပိုင်အယူအဆတွေနဲ့ရှင်သန်လှုပ်ရှားနေကြတာမျိုးပါ
ဗိုက်ကလေးတို့ စောကြီးတို့က လူငယ်ပီပီ
လူပျိုလူလွတ်ပီပီ
သားကြွေးမှုမယားကြွေးမှု အပူအပင်မရှိသူတွေပီပီ
အားရင် ရွားရိုးကိုးပေါက် သဝေထိုးရင်း
သွားလာပျော်ပါး သောက်စားရင်း
မဒီကညာလေးတွေကိုနောက်ပိုးရင်း
ရပ်ရေးရွာရေးဆိုလည်း အိမ်မပြန်တမ်း တက်တက်ကြွကြွလိုက်လုပ်ပေးနေရင်းသာအချိန်ကုန်ကြတယ်
တခါတခါကြုံကြိုက်လို့ နာယူတတ်ပေမယ့် ပညာရှာဖို့ရယ်လို့ စာအုပ်ရှာဖတ်တာ သိနားလည်သူတွေဆီ တကူးတကသွားရောက်လို့ အသိပညာစည်းပူးတာမျိုးရယ်လို့ မလုပ်ပါဘူး မလုပ်ကြဘူးပေါ့
ဒါကြောင့် စာတအုပ်ထဲမှာ ရွာစာကြည့်တိုက်ကို ဒီနှစ်ယောက်ရောက်နေတော့ ဆရာတွတ်အံ့ဩနေတာ
နောက်မှ စာကြည့်တိုက်မှာ ကောင်မလေးတယောက်ရောက်နေလို့ဆိုတာသိရမှ ဒါကြောင့်ပဲလို့ မှတ်ချက်ချသွားတာကိုး
ထားပါတော့
ခုပြောလိုတာက စောကြီးရဲ့ကဏ္ဍပါ
_____________________________________
ဇာတ်ရုပ်ငြိမ်ပြီးကာလမှာ စောကြီးရဲ့ယေဘုယအချက်အလက်က
လူပျိုကြီး
အမေအိုကြီးရှိပြီး နှမမေသိန်းလုပ်စာထိုင်စားနေသူ
ဒါပေမယ့်အိမ်အလုပ်မလုပ်ပေမယ့် ရပ်ရေးရွာရေးတွေမှာတော့ အားကိုးရတယ်
ပြီးတော့အလွန်အင်မတန်နောက်ပိုးသန်သူပေါ့
_____________________________________
ဒီမှာ သူကဆရာတွတ်ရဲ့တပည့်မဟုတ်တာ မိသားစုဝင်မဟုတ်တာ သတိထားဖို့လိုတယ်
ဒီတော့သဘာဝကျဖို့ဆိုရင် ဆရာတွတ်ဘေးမှာ အမြဲရှိနေလို့မရဘူး ဆရာတွတ်တို့သွားရာနောက် အကြောင်းမရှိဘဲအမြဲလိုက်နေလို့မရဘူး
ဗိုက်ကလေးတောင်မှ တအိမ်တည်းနေပေမယ့် တခါတခါ အိမ်ပြန်မအိပ်တာတို့ လျှောက်သွားနေတာတို့ကြောင့် အရေးအကြောင်းဆိုရင် သူ့အရင်ရှာရတာတလုပ် မဟုတ်လား
သဘောက မိသားစုဝင်ဖြစ်လင့်ကစား ဗိုက်ကလေးတောင်မှ သူ့ဝသီ သူစရိုက် သူ့အကြောင်းကိစ္စနဲ့သူ သွားလာလှုပ်ရှားနေတာပါ
ဒီတော့ ဆရာက စောကြီးကို ဦးတွတ်ပီတို့နဲ့ ခရီးအတူလိုက်စေချင်ရင် အကြောင်းကိစ္စခိုင်ခိုင်မာမာ ရှာပေးရတယ်
ဖွန်ကြောင်ဖို့ပဲဖြစ်ဖြစ်
ရွာကမဖြစ်မနေ ရှောင်ရမယ့်အကြောင်းမျိုးပဲဖြစ်ဖြစ်ပေါ့
ဒီသဘောကို မာယာပင်လယ်မှာတွေ့ရပါလိမ့်မယ်
_____________________________________
_____________________________________
ပြောလိုတာက မြန်မာဗီဒီယိုကားထဲက ဇာတ်ပို့လို
ဘာအလုပ် လုပ်လို့လုပ်မှန်းမသိ
ဘယ်လိုစရိုက်သဘာဝရှိမှန်းမသိ
ကိုယ်ပိုင်ဆန္ဒရည်ရွယ်ချက်မရှိဘဲ ဇာတ်လိုက်ဘေးမှာအချိန်ပြည့်ရှိနေပြီး ဇာတ်လိုက်ကိစ္စကိုသာလိုက်လုပ်ပေး ဇာတ်လိုက်ပြောသမျှဖော်လိုလိုက်နေတာမျိုး မဟုတ်ဘူးလို့ ဆိုလိုတာပါ
ဒါကြောင့်ပဲ ဆရာ့စာအုပ်တွေက သဘာဝကျနေတာ
_____________________________________
ဒါပေမယ့် နောက်ပိုင်းစာအုပ်တွေမှာ
စောကြီးက ဆရာတွတ်ရဲ့ တပည့်လိုလို
ဆရာတွတ်အိမ်မှာရေနွေးသောက်ရင်း မေးရင်းမြန်းရင်း ဟုတ်ပဟုတ်ပ ထောက်ခံရင်း အသိပညာစည်းပူးနေတာမျိုး
အကြောင်းကိစ္စမယ်မယ်ရရမရှိဘဲ ဆရာတွတ်တို့သွားရာ လျှောက်လိုက်နေတာမျိုးတွေများလာတယ်
ဒါက စောကြီးရဲ့ အကျင့်စရိုက်ပိုကောင်းလာစေတာမျိုး ဖြစ်ကောင်းဖြစ်နိုင်ပေမယ့်
တနည်းအားဖြင့် ဆရာဆွေမင်း (ဓနုဖြူ) တည်ဆောက်ထားတဲ့ လူပျိုကြီးစောတင်မောင်ရဲ့ စရိုက်လက္ခဏာပျက်စီးသွားတာလို့လဲ ဆိုနိုင်ပါလိမ့်မယ်
။
။
။
အဆိုပါ စာအုပ်တွေကို အမောင်နွားကျောင်းသားဖတ်ပြတဲ့ ဒို့ခေတ်ယူကျုချန်နယ်မှာ သွားရောက်နားစဉ်လို့ တော်လှန်ရေးမှာတတပ်တအားပါဝင်နိုင်သလို
စာအုပ်ဝယ်ဖတ်မယ်ဆိုရင်လည်း မူရင်းဖန်တီးသူရဲ့မိသားစုမျိုးဆက်တို့အတွက် အသီးအပွင့်ခံစားရစေမှာပါလို့
ယူကျုမှာကြည့်ရင် လူကြီးမင်းတို့ရဲ့အားထုတ်မှု အဟောသိကံမဖြစ်ဖို့ VPN ခံဖို့လည်း မမေ့နဲ့အုံးဗျနော
။
။
။
#အရေးတော်ပုံအောင်တော့မည်
#စစ်အာဏာရှင်မုချအဆုံးသတ်တော့မည်
။
ကိုလေး ☆ အင်းတဲ
No comments:
Post a Comment