စာရိတ္တနဲ့ဝါရိတ္တ (ငတိုလှိုင်ရဲ့အဆုံးသတ် / ၅၀)

 စာရိတ္တနဲ့ဝါရိတ္တ (ငတိုလှိုင်ရဲ့အဆုံးသတ် / ၅၀) 

။

အလွယ်ပြောရရင်တော့

ဝါရိတ္တဆိုတာက 

မကောင်းမှုကို မပြုမိ‌အောင်ရှောင်ကျဉ်တာမျိုး

ဥပမာ ငါးပါးသီလလိုပေါ့

စာရိတ္တဆိုတာက 

ကောင်းတာကိုပြုလုပ်တာပါ

ဥပမာ မိဖဆွေမျိုးတို့ကိုစောင့်ရှောက်တာ 

ရပ်ကျိုးရွာကျိုးအတွက် တက်တက်ကြွကြွပါဝင်တတ်တာ 

ကိုယ့်ဝန်တာကိုကြေပြွန်ရုံမက အကောင်းဆုံးဖြစ်အောင် ဆောင်ရွက်တတ်တာ 

မှားယွင်းတဲ့ အဓမ္မမှုတွေကို ရှုတ်ချကန့်ကွက်ရဲတာ တန်ပြန်အနိုင်ယူဖို့အားထုတ်တာ

မှန်သည့်ကောင်းအရာအတွက် ရဲရဲရင့်ရင့်ရပ်တည်ရဲတာ တိုးတက်ပွားများဖို့ကြံစည်တာ 

စသည်ဖြင့် လုပ်သင့်တဲ့အရာအတွက် ခေါင်းမရှောင် မသိသလိုမနေ ဖာသိဖာသာမပြုတတ်တာမျိုးပေါ့

___________________________________

ကိုယ်တွေငယ်ငယ်က ဒီစကားကို ဇာတ်ကားတွေမှာ အတော်လှိုင်လှိုင်အသုံးပြုခဲ့တော့ အားလုံးရင်းနှီးကြမှာပါ

ဒါပေမယ့် အဲ့ဒီကားတွေမှာက အရက်မသောက် ကွမ်းမစားဆေးလိပ်မသောက် သူတပါးသားမယားမပြစ်မှား စသည်ဖြင့်အရာတွေကိုတည်လို့သာ စာရိတ္တကောင်းသူလို့ သမုတ်ကြတာများပါတယ် 

အမှန်က ရှောင်ကျဉ်တာဆိုတော့ အဲ့ဒါတွေက ဝါရိတ္တပါ

___________________________________

ပြီးတော့ မင်းသမီးကချမ်းသာပေမယ့် ငယ်ငယ်ကတည်းက မိဘဆုံးပါးသွားလို့ လာရောက်အုပ်ထိမ်းပေးတဲ့ ဆွေမျိုးမိသားစုက လက်ဝါးကြီးအုပ်ကာ အိမ်စေသဏ္ဍန်ပြန်ခိုင်းစေလို့ နှိုပ်စက်သမျှခေါင်းငုံ့ခံနေရတာကို ဇာတ်နာနာနဲ့ကြည့်ဖူးကြတယ်ဟုတ် 

အံမယ်မျက်ရည်တွေဘာတွေများဝဲလို့

နောက်များအခြားလူ (မင်းသား) က လာရောက်ဖြေရှင်းပေးရသည်ချည်း သို့တည်းမဟုတ် ထွက်ပြေးတယ်ပေါ့

ဒါကကျွန်တော်တို့လူမှုအသိုင်းအဝိုင်းမှာ စာရိတ္တသီလ (သီလ=အကျင့်) ဖြန့်ဝေဖို့ ပျက်ကွက်ခြင်းရဲ့သင်္ကေတလေလာလို့တွေးမိတယ်

အမှန်တော့ ကျွန်တော်တို့က ကိုယ့်မျိုးဆက်ကို သိကြားမျှော်ဝါဒလို့ ကိုယ့်ပြဿနာကိုယ့်အရေးအရာကို လာရောက်ကူညီဖြေရှင်းပေးမယ့် ကယ်တင်ရှင်မျှော်ခြင်းသဘောထက် 

ကိုယ့်ရပိုင်ခွင့်ကိုသိဖို့နဲ့ မတရားလုယူလာရင် ကာကွယ်တတ်ဖို့ ကိုယ့်အားကိုယ်ကိုးဖြေရှင်းတတ်ဖို့ သင်ပေးသင့်တယ်

တခါတခါ ဒီနိုင်ငံမှာစစ်အာဏာရှင်တွေ ထင်တိုင်းကြဲခွင့်ရနေတာ အများပြည်သူကြားထဲ စာရိတ္တသီလ မထွန်းကားတာကြောင့်လေလားလို့လည်းတွေးမိတယ်

___________________________________

ဂီတစာဆိုမောင်ကြေးမုံရဲ့ #ဇာချည်ဇာလီ ဆိုတဲ့ အသံဇာတ်လမ်းနာထောင်ကြည့် ဒီသဘောတည်ထားတာသိပ်လှတယ်

သူမကိုယ်တိုင်က ဦးကြီးရဲ့မယားနဲ့သမီးရဲ့ချယ်လှယ်မှုက ကိုယ့်ရပိုင်ခွင့်ကိုထိပါးလို့ မတရားပြုနေတာကို ကာကွယ်ရမှန်းမသိ

သိတဲ့သူ သူမရဲ့ဆွေမျိုးရင်းခြာ ဦးကြီးကကျ စာရိတ္တသီလမရှိတော့ ရပ်တည်ပေးဖို့ သတ္တိကနည်း

ဒီအားနည်းချက်တွေကို ထင်သာမြင်သာအာင် ဆရာက နောက်ဇာတ်ကောင်တခုနဲ့ လှလှပပချိတ်ဆက်ဖော်ပြသွားတာ သိပ်ကောင်းတယ်

___________________________________

ဝါရိတ္တဆိုတဲ့ မကောင်းမှုကို မပြုဖြစ်အောင်ရှောင်ကျဉ်နိုင်ရင် ယေဘုယအားဖြင့် လူကောင်းတယောက်လို့ ဆိုနိုင်သည့်တိုင် လူတော်တယောက်ဖြစ်ဖို့ ကိုယ်ကော ကိုယ့်ပတ်ဝန်းကျင်ကိုပါ ကောင်းကျိုးဖြစ်ထွန်းဖို့ကကျ စာရိတ္တ ရှိပါမှဖြစ်မှာပါ

ဒါကြောင့်ပဲ ကျွန်တော်တို့ရဲ့ရှေးလူကြီးတွေက လူတယောက်ကိုအကဲခတ်ရင် စာရိတ္တကောင်းရဲ့လားဆိုတာကို အထူးတလည် အခြေပြုကြည့်ကြတာ 

___________________________________

ပြောရင်း မုံရွာက ဆရာကျော်ဝင်းပြောတာတောင်သတိရမိတယ် 

တကယ်တော့ဗျာ ဘုရားရှိကိုခိုးကို တိတိကျကျဘာသာပြန်ထုတ်‌ဝေမယ်ဆိုရင်တောင် စစ်အာဏာရှင်တွေမနှစ်မြိုနိုင်တဲ့ သဘောမကျနိုင်တဲ့ (ယခု စာရိတ္တလို မတရားမှုကို တွန်းလှန်ကျော်ဖြတ်အနိုင်ယူဖို့ဆိုတဲ့) အရာတွေပါတာမို့ စာပေစိစစ်ရေးကဖြုတ်ချလိမ့်မယ်ထင်တယ် 

ထုတ်ဝေခွင့်ရမယ်မထင်ဘူးတဲ့

။

။

#အရေးတော်ပုံအောင်တော့မည်

#စစ်အာဏာရှင်မုချအဆုံးသတ်တော့မည်

။

ကိုလေး ☆ အင်းတဲ