လက်ျာ (လက်ယာ = လက္ယာ)

 လက်ျာ (လက်ယာ = လက္ယာ)

.

ဒီစာလုံးပေါင်းသတ်ပုံလေးက မြန်မာ့လွတ်လပ်ရေးအတွက် တော်လှန်တိုက်ပွဲဝင်ခဲ့ကြတဲ့ ရဲဘော်သုံးကျိပ်ဝင် ဗိုလ်လက်ျာကိုအကြောင်းပြုပြီး ငယ်ငယ်လေးကတည်းက တရင်းတနှီးရှိနေခဲ့ပေမယ့် ဘာကြောင့် ဒီအသံထွက်ရလဲ စဉ်းစားမရအောင်ပါပဲ

ကဲရှင်းကြည့်ရအောင်

ပထမဆုံးအနေနဲ့ ယပင့် (ျ) နဲ့ ရရစ် (ြ ) သဘောကို စောကြောကြည့်ဖို့လိုတယ်

ယပင့်က (ျ) ယပက်လက်ကို ကိုယ်စားပြုတာဖြစ်ပြီး

ရရစ်က (ြ) ရကောက်ကိုကိုယ်စားပြုတာပါ

မြန်မာသတ်ပုံမှာ 

တခါတလေ အက္ခရာဖျောက်ပြီးရေးတတ်တာတွေရှိတယ်

ဥပမာ သကျ (သက်ကျ) ယောက်ျား (ယောက်ကျား) စကြဝဠာ (စက်ကြဝဠာ) တို့ပေါ့

ဒါပေမယ့် အဆိုပါသတ်ပုံတွေက အက္ခရာတူ စာလုံးဆင့်ကိုဖြောက်တာဖြစ်ပြီး ဒါကတမျိုးဖြစ်နေပြန်တော့ အဲ့ဒီထုံးကိုယူပြီးရှင်းလို့လည်း မဖြစ်ပြန်ဘူး မတူတာကြီးကို ဒီလိုပေါ့ကွာလို့ဇွတ်ညှိပြောပြန်ရင်လည်း စကားအရတော့နိုင်ကောင်းနိုင်သွားမယ် ကိုယ့်အဖြေအတွက် ကိုယ်ကိုယ်တိုင်တောင်ဘဝင်တကျရှိလှမှာတော့မဟုတ်ဘူး 

အဲ့ဒီတော့ စကားလုံးကလည်းအသုံးတွင်ပြီးမို့  

အဖြေရှိပြီးပုစ္ဆာအတွက် တွက်နည်းပြန်ရှာရမလိုဖြစ်နေတယ် 

ထားတော့ 

ယပင့်က (ျ) ယပက်လက်ကိုကိုယ်စားပြုတာဆိုတော့ အသွင်ယူထားတဲ့ ယပင် (ျ) နဲ့ မရေးဘဲ အမှန်ရေးရင် 

- လက္ယာ - ဒီလိုဖြစ်ရမှာပေါ့

ဒါပေမယ့် ဗမာစာရေးထုံးမှာ ယက်လက်က စာဆင့်ရိုးထုံးစံကမရှိပြန်ဘူး 

ပြီးတော့ အဘိဓါန်မှာလည်း ဒီစကားလုံးမပါဘူး 

(စာလုံးဆင့်ထုံးနဲ့ပတ်သက်ပြီး ရေးခဲ့ပြီးမို့ ပြန်မရေးတော့ပါဘူး)

ဒီတော့ စာဆင့်လို့ကလည်းမရပြန် ဆန်းဆန်းသစ်သစ်ချုံ့ကလည်းချုံ့လိုပြန်ဆိုတော့ ဒီရေးထုံး ဒီစကားစုသတ်ပုံလေးပေါ်လာတယ်လို့ ထင်ရတာပါပဲ 

တနည်း ခေတ်ကာလအရပေါ်လာတဲ့ ဗန်းစကားပေါ့

ကျွန်တော်တို့ တခါတခါနောက်ပြီးရေးတဲ့ 

ဆြာ (ဆရာ) ဆိုတဲ့ ဝေါဟာရလိုပေါ့

တွေးကြည့်တာပါ 

မုချအမှန်လို့တော့ မဆိုလိုပါဘူး

.

.

#အရေးတော်ပုံအောင်တော့မည်

#စစ်အာဏာရှင်မုချအဆုံးသတ်တော့မည်

။

ကိုလေး ☆ အင်းတဲ