အဖန် ၅၀၀ ငါးကမ္ဘာ (ငတိုလှိုင်ရဲ့အဆုံးသတ် / ၄၀)
.
ဒီစကားလုံးလေးက ဘယ်လိုပေါ်လာလဲတော့မသိဘူး
ဘာသာရေးအဆုံးအမတွေကနေ ဆင့်ကဲထုတ်ယူထားတာမျိုးလို့ယုံကြည်ကြပေမယ့် ကိုယ်တော့ဖြင့် ခုထိနာကြားဖတ်ဖူးသမျှ ဒေသနာတွေမှာ ဒီသဘောဆိုတာထားတာ အရိပ်အမြွက်တောင်မတွေ့ဖူးပါဘူး
ထားပါတော့
_________________________
ကိုယ့်ကိုယ်ကို သတ်သေကြသူတွေကို အဖန် ၅၀၀ ငါးကမ္ဘာတိုင်တိုင် ဖြစ်ရာဘဝတိုင်းဘဝတိုင်းမှာ
ကိုယ့်ကိုယ်ကို သတ်ပြီးတော့သာ သေနေလိမ့်မယ်
သေနေရလိမ့်မယ်လို့ သတိပေးတာမြစ်တာက ပြဿနာကို အရှုံးပေး ထွက်ပြေးသူမဖြစ်အောင် ရည်ရွယ်ကြပုံပဲ
_________________________
အမှန်တော့ ဒီလိုဖြစ်ဟန်တူပါတယ်
လူတယောက်ဟာ
ငွေရေးကြေးရေးကြောင့်ပဲဖြစ်ဖြစ်
လူမှုရေးကိစ္စကြောင့်ပဲဖြစ်ဖြစ်
နှလုံးသားရေးရာကိစ္စကြောင့်ပဲဖြစ်ဖြစ် ပြဿနာတစုံတရာပေါပေါက်လာသည်ဆိုပါစို့
ထိုပြဿနာကို ဖြေရှင်းနိုင်မယ့်နည်း ကျော်လွှားနိုင်မယ့်နည်းကို ဘယ်လိုမှရှာမရဖွေမရ ကြံဆမှုမရဖြစ်လာချိန်မှာ ထိုပြဿနာကို လက်မြှောက်အရှုံးပေး ထွက်ပြေးခြင်းကို ရွေးချယ်လို့ သတ်သေသွားတယ်
သဘောက သူ့အရည်အချင်း စိတ်ဓာတ်ခိုင်ကြည်မှုက
ထိုပြဿနာအခက်အခဲပမာဏကို မကျော်လွှားနိုင်တာမျိုးပေါ့
ပြောရရင် ကိုးတန်းလောက်အထိအခက်အခဲမျိုးကိုတော့ သူရင်ဆိုင်ဖြေရှင်းနိုင်ပေမယ့် ဆယ်တန်းရဲ့အခက်အခဲပြဿနာဖြစ်လာချိန်မှာ မကျော်လွားနိုင်ဘူး ဒီတော့ ဆယ်တန်းကျတယ်ပေါ့
_________________________
ဘဝဆိုတာကလည်း လူမျိုးတွေ
ခန္ဓာတွေ
တိုင်းပြည်တွေ
ခေတ်ကာလာတွေသာခြားနားမယ် ဘယ်သူဖြစ်ဖြစ် ဒီအခက်အခဲ ဒီပြဿနာတွေကို ကြုံဖူးကြသည်ချည်း ကြုံရမှာချည်းကိုး
ဒီတော့ ဆယ်တန်းကျလို့ထွက်ပြေးသူတယောက်က နောက်တဖန်ကျောင်းပြန်တက်တော့လည်း ဆယ်တန်းဆိုတဲ့ အခက်အခဲပြဿနာက စောင့်ကြိုနေတာပါပဲ
သူ့မှာအဲ့ဒီအခက်အခဲကို ကျော်လွန်နိုင်တဲ့ အရည်အချင်း စိတ်ဓာတ်ခိုင်ကြည်မှုမှ မရှိသေးဘဲ မရသေးဘဲကို
အောင်ချင်ရင်တော့ ကျော်နိုင်အောင်လုပ်ပေါ့
_________________________
ဘဝနဲ့ပြန်ဆက်ရရင် ဒီဘဝမှာ ဒီအခက်အခဲကို ရင်မဆိုင်နိုင် မကျော်လွှားနိုင်လို့ အရှုံးပေးထွက်ပြေးသူဟာ နောက် တဖန်ဘဝမှာလည်း ဒီအခက်အခဲ ဒီပြဿနာ ကြုံတွေ့လာချိန်မှာ အထုံဝသီလိုဖြစ်ခဲ့တဲ့ သူ့စိတ်အစဉ်ကလေးက ဆွဲဆောင်တယ်
အရှုံးပေးလိုက်ဖို့
သတ်သေဖို့ပေါ့
_________________________
ဒီလိုနဲ့ ဒီစိတ်အစဉ်လေးကို ဖြတ်တောက်ပြစ်ဖို့ မကြိုးစားသမျှကာလပတ်လုံး ကျော်လွှားနိုင်မယ့် နည်းနိဿယတွေကို မကြံစည်အားမထုတ်နိုင်သမျှကာလပတ်လုံး ဒီနည်းအတိုင်းပြုဖို့ချည်း စိတ်ကညွှတ်မိနေတတ်တယ်
အဖန် ၅၀၀ ငါးကမ္ဘာမကပေါ့
_________________________
ခု မအလအာဏာ စိုးပိုင်ခွင့်ရနေလည်း ဒီအတိုင်းပဲပေါ့
မိသားစု စည်းစိမ်ဥစ္စာ ရပိုင်ခွင့်တွေနဲ့ ခြိမ်းခြောက်ဆွဲဆောင် အကြပ်ကိုင်ချိန်မှာ မတရားမှန်းသိသည့်တိုင် မကြိုက်သည့်တိုင် ရပ်တန့်လိုက်ကြတယ် နောက်ပြန်ဆုတ်လို့ အရှုံးပေးသွားကြတယ်
သဘောကတော့ သတ်သေသူလိုပါပဲ
မတရားမှုကို တော်လှန်ရာမှာ ဒီအခက်အခဲ ဒီစမ်းသပ်မှုတွေက ကြုံတွေ့ရ ကျော်ဖြတ်ရမှာချည်းပါ
မကျော်လွှားဘဲ
ကျော်လွှားဖို့အားမထုတ်ဘဲနေရင် ဘာဖြစ်မလဲ
စောစောကသတ်သေသူလိုပေါ့
ဒီအခက်အခဲနဲ့ကြုံတိုင်း နောက်ပြန်ချည်းလှည့် အရှုံးပေးနေရင် မတရားမှုက ကြီးစိုးခွင့်ရနေအုံးမှာပါပဲ
လက်နက်ရှိသူကို အစဉ်အဆက်ကြောက်နေ စိုးထိတ်နေရအုံးမှာပါပဲ
ကိုယ်ယုံကြည်တဲ့အတိုင်း ရဲရဲရင့်ရင့် မရပ်တည်
မပြောဆို မလျှောက်လှမ်းရဲသူ ဖြစ်နေအုံးမှာပါပဲ
အဖန် ၅၀၀ ငါးကမ္ဘာမကပေါ့
.
#အရေးတော်ပုံအောင်တော့မည်
#စစ်အာဏာရှင်မုချအဆုံးသတ်တော့မည်
။
ကိုလေး ☆ အင်းတဲ
No comments:
Post a Comment