သေလွန်ပြီးအတွေးများ
။
ကျွန်တော်တို့အရှေ့တိုင်းမှာ သေလွန်ပြီးနောက် တဖန်ဘဝဖြစ်ပေါ်ခြင်းတွေ လူဝင်စားဆိုတာမျိုးတွေ ဘဝဟာအမျှင်မပြတ်လည်ပတ်ခြင်းသဘောတွေရှိတော့ ဘာသာအယူဝါဒတိုင်း ဒီလိုရှိလိမ့်မယ်လို့ယူဆခဲ့ဖူးတယ်
အမှန်တော့ ဒီလိုမဟုတ်ဘူးဗျ
ဖန်ဆင်းခြင်းကိုယုံကြည်တဲ့ ခရစ်ယာန်တို့ အစ္စလာမ်ဆိုက တဘဝသာဖြစ်ခြင်းသဘောမျိုးယူဆကြတယ်
ပုဂ္ဂိုလ်တဦးတယောက်ရဲ့ ဝိညာဉ်ဟာ သေလွန်ပြီးနောက်မှာ နေရာဌာနတခုမှာတည်နေပြီး ကမ္ဘာကြီးပျက်သုဉ်းမယ့်နောက်ဆုံးနေ့မှာ ဘုရားသခင်ရဲ့အဆုံးအဖြတ်ကိုခံယူရမယ်
ထာဝရကောင်ကင်ဘုံမှာစံရမလား
ထာဝရငရဲမှာခံရမလားဆိုတာပေါ့
ဒီလိုဆိုရင် တိရစ္ဆာန်တွေကကော ဘုရားသခင်ရဲ့အဆုံးအဖြတ်ကိုခံယူလို့ ကောင်းကင်ဘုံရောက်နိုင်လားဆိုရင် ဒီလိုတော့မဟုတ်ဘူး သူတို့ကို မူလဖန်ဆင်းခြင်းရည်ရွယ်ချက်ကိုက လူသားတို့အတွက်အထောက်အကူရဖို့သက်သက်မို့သူတို့ရဲ့ဖြစ်တည်မှုက သိပ်အရေးမပါလှဘူးပေါ့
ကံဝါဒဖြစ်တဲ့ အရှေ့တိုင်းဒဿနဘာသာအယူဝါဒတွေမှာတော့ တကမ္ဘာမှာတင်ကို ဘဝကအမျှင်မပြတ်ဆက်ဆက်ဖြစ်နေတဲ့သဘောကိုယုံကြည်တယ်
သူပြုခဲ့သည့် ကံအားလျှော်စွာ လူဖြစ်လိုက် နတ်ဖြစ်လိုက် တိရစ္ဆာန်ဖြစ်လိုက် ပြိတ္တာဖြစ်လိုက် ဗြဟ္မာဖြစ်လိုက် ငရဲကျလိုက်ပေါ့
ဒါကြောင့်ပဲ လူဝင်စားဆိုတာမျိုး
ဘယ်သူတော့ဖြင့် ရှေ့ဘဝကဘယ်သူဝင်စားတယ် အကုန်ပြောနိုင်တယ်ဆိုတာမျိုး ခဏခဏကြားကြရတယ်
ကြားသည့်အတိုင်းလည်း အတိတ်ဘဝက သားအကြောင်း မယားအကြောင်း ပစ္စည်းဥစ္စာနေရာဌာနအကြောင်း အပ်ကျမတ်ကျပြောနိုင်ကြတော့ ဘဝတဖန်ကူးပြောင်းခြင်းသဘောက ဝိဝါဒမကွဲဘဲ ယုံကြည်လောက်စရာအကြောင်းပြချက်ကောင်းတွေဖြစ်နေပြန်တယ်
ဒီတော့ သေလွန်ပြီးနောက် ဝိညာဉ်နဲ့ပတ်သက်လို့ သင်ကောဘယ်လိုယုံကြည်သလဲ
ထာဝရဖန်ဆင်းရှင်ရဲ့ ဖန်တီးမှုနဲ့ တဘဝသာဖြစ်ပြီး ကမ္ဘာ့နောက်ဆုံးနေ့ရက်မှာ ဘုရားခင်ရဲ့အဆုံးအဖြတ်ကိုခံယူလို့ ထာဝရခံရ စံရဖို့ ခံယူဖို့စောင့်ဆိုင်းခြင်းသဘောလား
ဒါမှမဟုတ် ကံဝါဒီတို့လို မိမိပြုတဲ့ ကောင်းမှုမကောင်းမှုအားလျှော်စွာ နိမ့်ချည်မြင့်လှည့်ဘဝသံသရာကို ဖြတ်သန်းခြင်းသဘောကိုလား
။
။
။
#အရေးတော်ပုံအောင်တော့မည်
#စစ်အာဏာရှင်မုချအဆုံးသတ်တော့မည်
။
ကိုလေး ☆ အင်းတဲ
No comments:
Post a Comment